Gov. Garcia ikiha sa Environmentalists

CEBU, Philippines - Usa ka grupo sa mga environmentalist ang nangandam nga mosang-at og reklamong administratiba batok ni Cebu Governor Gwendolyn Garcia ngadto mismo sa Office of the President pinaagi sa Department of Interior and Local Government (DILG).

Si Gloria Ramos, co-director sa Philippine Earth Justice Center dihang nahinabi sa The Freeman (igsuong pamantalaan sa Banat News), nagkanayon nga usa ka grupo sa mga concerned citizen ang mopasaka usab og kaso sa gobernadora tungod sa conflict of interest.

Gipasabot ni Ramos nga ang Cebu province nga gipangulohan ni Garcia mao unta ang mopatuman sa mga balaod batok sa polusyon, apan nahimo na hinuon kining contractor sa mga regulated industry sama sa kontrobersiyal nga 2X100 mw sa KEPCO-SPC Power Corporation's sa barangay Colon sa Naga City, nga inagurahan karong adlawa ni President Benigno Aquino III.

Kahinumduman nga ang grupo ni Ramos mao usab ang mikisikisi sa pagpalit sa lalawigan sa kontrobersiyal nga Balili property nga himuong dumpsite sa coal ash sa KEPCO.

"That is a clear conflict of interest. Under the Clean Air Act and Solid Management Act, the province is duty bound to enforce the law and yet the province is dependent on KEPCO for its coal ash dumping. There are some laws requiring proper dumping,” matud pa ni Ramos said. Ang PEJCE uban sa ilang mga petitioners, Central Visayas Farmer’s Development Center, Central Visayas Fisherfolks Development Center , ug mga lumulupyo sa Toledo City and Naga City mipasaka na og lahing kaso batok ni Garcia kabahin sa pasangil nga pagtugot sa gobernadora sa pagpataka og labay sa mga coal ash sa mga power plants nga KEPCO-SPC sa Naga ug Toledo Power Plant ug Cebu Energy Development Corporation sa Toledo .

Usa ka court hearing sa maong kaso ang ipahigayun usab karong adlawa atubangan sa sala ni Judge Marilyn Yap, presiding judge sa Branch 55, Regional Trial court sa Mandaue City.

Gawas sa gobernadora, lakip sa mga gipasakaan og kaso mao ang mga opisyal sa mga local government units uban sa mga opisyal sa Department of Environment and Natural Resources. (BANAT NEWS)