Hepe nakapatay sa sakop

CEBU, Philippines - Patay ang usa ka tanod sa barangay Pitalo, lungsod sa San Fernando human kini aksidenteng napusilan sa iyang hepe niadtong Sabado sa gabii samtang nagpahigayon sila og operasyon batok sa ilegal nga sugal diha sa sitio Baybayon sa nahisgutang barangay.

Ang biktima mao si Allan Ladica, 30, kinsa nakaangkon og samad pinusilan sa iyang tiyan ug patay nang naabot sa South General Hospital sa dakbayan sa Naga.

Padayon karong gipangita ang suspetsadong si Cresente Generale, 64, hepe sa tanod sa maong barangay kinsa daling misibat human sa hitabo.

Base sa imbestigasyon sa kapolisan, si Ladica ug Generale uban sa laing duha ka mga tanod nga sila si Mario Borres ug Walter Caamino nagpahigayon og pagpangronda batok sa nagsugal og hantak diha sa sitio Baybayon.

Si PO1 Lauro Laurel sa San Fernando Police Station mibutyag nga dihang naabot sila lugar aduna sila’y naabtang nagsugal ug si Generale giingong mihulbot sa iyang kalibre .45 nga pistola ug mipabuto niini og upat ka warning shots tumong sa yuta.

 Apan human sa maong mga warning shots giingong mibuto sa pag-usab ang pistola ni Generale ug naigo niini ang iyang sakop nga si Ladica.

Na-recover sa mga polis diha sa lugar nga nahitaboan ang lima ka kabhang sa mga bala ug usa ka deformed slug sa kalibre .45 nga bala.

Matud ni Laurel nga sa maong hitabo ang mga tanod napakyas sa pagsikop sa mga nagsugal.

 Ang hepe sa San Fernando Police Station nga si Senior Inspector Carlos Reyes nagkanayon nga mipahigayon na sila og imbesgasyon kabahin sa paghupot ni Generale og pistola.

Ang mga tanod gidid-ang makahupot og armas gawas lang kung aduna sila’y legal nga papeles paghupot ug padala-dala niini gawas sa ilang mga panimalay.

Si Reyes midugang nga si Generale mag-atubang og kasong homicide ug illegal possession of firearms. (EIM)(BANAT NEWS)