CEBU, Philippines - Kritikal ang kahimtang sa usa ka tawo nga gipusil sa tulo ka wala hiilhing kriminal didto sa sitio Sta. Cruz sa barangay Guizo, dakbayan sa Mandaue sa miaging gabii.
Ang biktima mao si Dindo Dapanas, 29 anyos, ulitawo nga nagpuyo sa maong dapit ug igsoon ni Benito Dapanas nga suspetsado sa pagpamusil patay sa ilang silingan niadtong Hunyo 21 sa gabii nga wala madakpi sa mga polis kay abtik kining nakasibat.
Si PO3 Leo Batigalao sa kapolisan sa Presinto 1 sa Centro Police Station sa Mandaue City Police Office (MCPO) nga nahinabi sa Banat News miingon nga ang biktima paingon nang misulod sa ilang balay dihang kalit lang miabot ang tulo ka armadong lalaki nga wala hiilhi kinsa pulos nagkawo og ball cap.
Unya dihadiha gipusil ang biktima ug nasabak kini sa buko-buko kansang bala milapos sa iyang dughan. Ang biktima dali nga gidala ngadto sa Mandaue City District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo.
Si PO3 Batigalao miingon nga dako sila og pagtuo nga sumpay ang maong hitabo sa pagpamusil niadtong Hunyo 21 niining tuiga nga mipatay kang Marvin Soronio nga nagpuyo gihapon sa maong dapit. Ang sakop sa pamilya ni Soronio wala pa gyud mopatim-aw sa buhatan sa kapolisan aron pasakaan og kaso.
Nasayran sa kapolisan nga ang mga suspetsado pulos mga sakop sa fraternity nga Tau Gamma ug Alpha Kappa Rho. (BANAT NEWS)