Upat ka bata gi-molestiya sa 64-anyos nagpatabang sa PWC

CEBU, Philippines -  Laing upat ka mga bata ang miduol ug nagpakitabang sa Provincial Women's Commission (PWC) tungod sa giingong pagpangabuso kanila sa ilang kaugalingong mga kabanay.

Gitug-an ni Hida Largo, ang Gender and Development Officer sa Cebu Provincial Women’s Commission nga ang inahan sa mga biktima maoy midangop sa ilang buhatan aron sa pagpangayo og tabang tungod sa pagpangabusong nasinati.

Sigon pa ni Largo nga ang mga bata nga nabiktima sa pagmolestiya nagpangidaron og 2, 7, 8 ug 11-anyos nagpuyo sa dakbayan sa Carcar kinsa pulos gihaylo sa 64-anyos nilang kabanay.

Wala hinuon ibutyag kung unsa ka duol nga paryente sa mga biktima ang suspek. Apan sumala pa sa inahan ngadto ni Largo nga gihaylo sa suspek og tambis nga prutas ang mga bata.

Dihang misalig na ang mga bata mao gihapon kini maoy iyang gigamit paghaylo aron mosugot ang mga bata sa yawan-on niining tinguha sa mga bata.

Hinuon ang maong hitabo ilaha nang gisumbong ngadto sa kapolisan ug gihikay nalang ang mga papeles aron mahingpit ang pagtabang sa kagamhanan sa lalawigan sa Sugbo ngadto sa mga biktimang mga bata. (BANAT NEWS)