CEBU, Philippines - Ang assistant division superintendent sa Department of Education (DepEd) sa dakbayan sa Talisay nga maoy gitumbok sa gitaktak sa Visayas Ombudsman nga principal nga maoy nagpaluyo sa maong kaso mihimakak sa mga pasangil sa naulahi.
Si Ofelia Hermosa mihimakak sa pasangil batok kaniya sa kanhi prinsipal sa Talisay City Central School nga si Maria Lourdes Ipong. Si Ipong gimando sa Ombudsman nga taktakon sa serbisyo tungod sa kasong malversation of public funds ug falsification of documents. Ang kaso giduso ngadto sa Ombudsman Visayas sa grupo sa Talisay City Swimming and Life Saving Association Inc. (TCSLSAI).
Apan si Ipong sa uwahing pakighinabi sa mga tigbalita pipila na ka adlaw ang nakalabay mipasangil kang Hermosa nga maoy nagpaluyo sa tanan tungod kay nasina kini ngadto kaniya.
Gawas niini ang maong prinsipal mipasangil usab ngadto kang Hermosa nga maoy nag-apod-apod sa kopya sa desisyon sa Ombudsman aron siya mapakaulawan ug mibahad usab siya nga mopasaka og kaso batok kang Hermosa.
Apan si Hermosa nga nahinabi sa Banat News kagahapon mihimakak sa mga pasangil ni Ipong batok kaniya tungod kay ang misang-at og kaso batok sa maong principal dili niya madiktaran tungod kay husto sila sa kabuot nga naglakip sa mga pari.
“Maybe she runs out of reason mao nang bisan kinsa na lang ang iyang gipasanginlan,” ni Hermosa pa.
“Why should I envy her? In the first place unsa may rason nga masuya ko niya?, well in fact assistant superintendent na intawon ko ug nakahibawo ang mga taga Talisay og giunsa nako pag-abot ani akong posisyon karon and I have earned it in high grades, wala ko’y tawong giyatakan, wala ko’y tawong gitumban ug nganong magsuya-suya man ko?,” dugang ni Hermosa.
Hinuon si Hermosa mipadayag sa iyang kaluoy sa sitwasyon karon ni Ipong nga gitaktak sa iyang katungdanan apan siya mitambag nga kinahanglang tubagon niini ang mga alegasyon ug di ipahid sa laing mga tawo. Si Hermosa nagkanayon usab nga atubangon niya ang kasong ipasaka ni Ipong batok kaniya.
“I am willing to face it, kung moabot ang panahon nga moingon siya nga iyaha gyud kong ikiha akong atubangon, I believed that I am standing on the solid ground.” (BANAT NEWS)