CEBU, Philippines - Gidayeg mga delegado sa Korte Suprema sa Peoples Republic of China (PRC) ang pagdumala sa kagamhanan sa lalawigan sa Sugbo sa Cebu Provincial Detention and Rehabilitation Center (CPDRC).
Kini maoy gibutyag ni Bise Gob. Agnes Magpale kinsa maoy miabi-abi sa delegasyon sa mga hurado gikan sa nasud sa China sanglit atoa pa sa nasud sa South Korea si Gov. Gwendolyn Garcia.
Matud pa ni Magpale gidayeg sa mga hukom sa China ang pagkadesiplinado sa mga piniriso ug ang mga kaayohang nakab-ot sa mga piniriso nga nagbag-o sa ilang kinabuhi human mabilanggo sa CPDRC. Partikular nga gidayeg sa mga opisyal sa China ang sikat na kaayong mga CPDRC Dancing Inmates.
Tungod niini, ang mga membro sa delegasyon sa Supreme Court sa Peoples Republic of China nagkanayon nga posibling ilang sagupon ang maong sistema nga gipatuman sa CPDRC ngadto sa ilang nasud.
Sumala pa niya nga gituki usab og maayo sa nahisgutang delegasyon ang mga policies and judicial process sa probinsya ug sa nasud aron makakuha og ideya kung unsaon pag-reporma sa ilang mga inmates. (BANAT NEWS)