Gipatay tungod sa fake money

CEBU, Philippines -  Napalgang patay nga lalaki niadtong Huwebes diha sa barangay Biasong, dakbayan sa Talisay nailhan na kagahapon sa buntag ug gidudahang ang motibo sa krimen mao ang mini nga kwarta.

Si Jelina Amancia, 24-anyos taga barangay Candulawan sa nahisgutang siyudad mianha sa Talisay City Police Station kagahapon sa buntag ug miila sa napalgang patay nga mao si Dexter Resuena, 28, nga iyahang kapuyo.

Si PO2 Stephen Sefuesca kinsa usa sa mipahigayon og imbestigasyon sa maong krimen mibutyag sa Banat News kagahapon nga si Amancia mibutyag kanila nga si Resuena nagtrabaho isip construction worker ug tulo na ka semana nga wala mopauli sa ilang balay. Dihang napalgan ang patay’ng lawas ni Resuena sa usa ka bakanteng lugar sa Biasong gidala kini sa mga polis diha sa Saint Francis Funeral Home sa barangay Bulacao Talisay. Si Resuena nailhan ni Amancia tungod sa gisul-ob niining t-shirt ug short pants ug sa dental findings.

Matud usab ni Sefuesca nga niadtong Huwebes sa gabii ang katapusang tawo nga gikakuyog ni Resuena mao ang ig-agaw niini nga nailhan lang niya sa pangalan nga “Harris” nga residente sa barangay Biasong.

Si Sefuesca nagkanayon usab nga sa milabay’ng mga adlaw si Harris ug Resuena nagpatimbang og mga scrap metals nga mihalin og P400.

Apan giingong mitumaw ang panaglalis sa manag-agaw human nadiskubrehang peke ang P200 nga kwarta nga gihatag ni Resuena ngadto kang Harris isip bahin niini sa halin sa scrap metal.

Matud pang Amancia labihang sukoa ni Harris kang Resuena ug nadunggan niya kining mibahad nga iya kining patyon sa gibuhat niini pag-ilad kaniya.

Sa pagsusi sa kapolisan diha sa gipuy-an ni Harris ilang nahibaw-an nga milarga na kini ngadto sa Manila niadtong milabay’ng adlaw. Ang kapolisan padayon nga nanguha og ebidensya batok sa suspek aron mapasaka ang kaso.(EIM)(BANAT NEWS)