Mga trabahante sa hotel i-polygraph test

CEBU, Philippines - Ipaubos sa polygraph test ang pipila ka empleyado sa hotel diha sa downtown area diin napalgang patay ang usa ka Israeli national niadtong miaging semana aron masuta kun wala ba sila mamakak sa gihimong imbestigasyon sa kapulisan.

Kini human migawas ang resulta sa awtopsiya nga wala tuyoa sa pagpatay si Max Efergan,75, nga giingong usa ka Moroccan- Israeli kinsa napalgan sa mga empleyado ilawom sa iyang kama nga giputos og habol sa giabangan nga lawak sa usa ka hotel sa downtown area.

Si Sr. Supt. Melvin Ramon Buenafe, hepe sa Cebu City Police Office (CCPO) mitug-an sa mga tigbalita nga gikuha na ang patay’ng lawas ni Efergan sa usa ka representante sa embahada sa Israel dinhi sa Pilipinas nga si Rex Antonio Rediang Jr. niadtong miaging adlaw ug gidala na paingon didto sa Israel.

Matud ni Buenafe walay nakitang fracture wounds sa patay’ng lawas ni Efergan subay sa resulta sa awtopsiya sa PNP Crime Laboratory apan nagduda silang dunay laing paagi sa pagpatay ang gihimo sa mamumuno ngadto sa biktima.

Sumala pang Buenafe walay nakitang timailhan ang kapulisan nga gipatay kini sulod sa giabangang lawak.

Ang ipailawom sa polygraph test sa kapulisan mao ang security guard sa maong hotel, duha ka room boy, usa ka attendant ug ang higala sa biktima nga usa usab ka Israeli.

Hinuon mitataw si Buenafe nga ang specimen sa biktima gipadala sa ulohang buhatan sa PNP Crime Laboratory aron matino gyud kun unsay hinungdan sa kamatayon niini.

Ang kapulisan dunay gidudahang suspek nga posibleng maoy mihimo sa krimen nga padayon pang gipangita sa kapulisan sa pagka karun. - (BANAT NEWS)