CEBU, Philippines - Dul-an sa 300 ka mga polis ang mobantay sa show sa inilang host sa TV5 ni Willie Revillame nga ‘Will Time Big Time’ karung gabii nga anha ipahigayon sa South Road Property (SRP) habig sa barangay Mambaling siyudad sa Sugbu.
Si Chief Insp. David Señor, hepe sa Traffic Division nga nahinabi sa Banat News nagkanayon nga 275 ka mga polis nga naglakip sa mga sakop sa Special Weapons and Tactics (Swat) Team, Theft and Robbery Section (TRS) ang mobantay karung gabii atol sa maong show.
Kagahapon sa udto si Señor mipahigayon og dry run sa 275 ka mga polis diin gibahin sa katorse ka sektor aron makahimo sila og adjustment ugmang adlawa ilabi na kun magsugod na ang maong TV show aron ilang ma-estudyohan daan ang ilang higpit nga seguridad.
Matud ni Señor nagsugod ang deployment sa mga polis gahapon sa alas-5 sa hapon ug ang mga sakop sa SWAT karung alas-6 sa buntag (Biyernes) nga naka-estambay nang daan diha sa Mambaling.
Si Señor mibutyag nga duna say usa ka gatos ka sakop sa Barangay Peacekeeping Action Team (BPAT) nga moabag sa kapulisan pagbantay sa kahusay’g kalinaw.
Giawhag ni Señor ang katawhan, ilabina kadtong gikan pa sa probinsya nga motan-aw sa maong TV show nga dili gyud magdala og daghang kwarta ug kun magdala man gani kanang igo lang nga pamelite ug snacks.
Hinuon dunay duha ka team sa TRS ang mobantay sa palibot sa kinabag-ang katawhan nga mosaksi sa maong show. Kini maoy unang higayon nga ang TV5 mipahigayon og show dinhi sa Sugbu sukad mibalhin sa Revillame. - (BANAT NEWS)