14-anyos giluba sa pag-umangkon nga 14-anyos

CEBU, Philippines -  Usa ka 14-anyos nga traysikad drayber ang nalandig sa tambalanan human gidunggab sa laing 14-anyos nga iya ra usab pag-umangkon nga traysikad drayber human sa ilang panaglalis kagahapon sa kaadlawon pasado ala 1:50 diha sa barangay Basak San Nicolas siyudad sa Sugbu.

Si Danilo Omasdang, 14-anyos nahiagom og duha ka samad dinunggaban sa iyang bukobuko ug anaa sa Cebu City Medical Center (CCMC) samtang ang suspetsado mao ang iyang pag-umangkong 14-anyos.

Si Dennis Omasdang, 19, maguwang sa biktima mitug-an sa kapulisan nga sila ug iyang manghod nagkuyog sa suspetsado nga naglakaw niadtong higayona.

Kalit mitumaw ang panaglalis tali sa iyang manghod ug suspek hinungdan nga miuli sa ilang balay ang suspetsado ug mikuha’g kutsilyo ug gibalikan iyang manghod ug gidunggab kaduha ka           higayon.

Ang 14-anyos nga suspek gisikop ni Allan Cabillo, tanod sa naasoy’ng barangay ug gi-turnover ngadto sa kapulisan.

Samtang sa pikas bahin wala pa mailhi sa kapulisan ang usa ka lalaki nga ex-convict nga sakop kaniadto sa Batang Cebu (BC) .45 nga gidunggab sa miaging gabii diha sa sitio Sampaguita, Villagonzalo 2 sa barangay Tejero.

Ang biktima nga anaa karun sa Cebu City Medical Center (CCMC) human nakaangkon og samad dinunggaban sa ibabaw nga bahin sa iyang tiyan gibana-bana 30-anyos ang pangidaron, nagsul-ob itom nga t-shirt, itom nga short pants, kasarangan ang gidak-on sa panglawas, ‘5”3 ang gitas-on, dunay bc .45 nga tattoo sa iyang tuo nga paa.

Ang mga sakop sa Mobile Patrol Group (MPG) nga miresponde sa alarma nakakuha sa kiliran sa biktima og usa ka kutsilyo nga may gitas-on nga onse ka pulgadas.

Subay sa pasiunang imbestigasyon sa kapulisan nakit-an nalang sa mga residente ang biktima nga nagdagan sa sudlonon nga bahin sa maong lugar ug kalit nga nahagba.

Daling giduol sa mga residente ang biktima ug nasuta nga gidunggab na diay kini sa wala pa mailhing tawo.