Pre-agi matapos karon

CEBU, Philippines -  Tulo ka adlaw nga Pre-Annual General Inspection and Operational Readiness Inspection Test and Evaluation ang gipahigayon sa Cebu Provincial Police Office (CPPO) diin tumong ug tuyo niini mao ang pagtino sa katakus ug kaandam sa kapulisan sa probinsya pagtubag sa emerhensiya.

Gihimo ang inspeksyon sa mga police stations sugod niadtong Miyerkules ug matapos karong adlawa pinangulohan ni Sr. Supt. Patrocinio Comendador.

“This is to evaluate the state of preparedness of the command, an operational readiness,” matud pang Comendador. Ang inspeksyon naglakip sa dress codes, kalimpiyo matag police station ug ilang adlaw-adlaw nga gimbuhaton.

Duha ka teams naglangkob og walo ka miyembro gikan sa CPPO headquarter maoy mi-inspeksyon sa mga police station didto sa amihanang bahin sa lalawigan.

Si Chief Inspector Ali Baron, hepe sa Provincial Public Safety Company ang nangulo sa Inspeksyon didto sa habagatang bahin sa lalawigan. Samtang si Chief inspector Alexander Soledad, hepe sa Provincial Patrol Section, mao sab ang nangulo sa amihanan.

Sa iyang bahin si Comendador mitataw nga atol sa iyang surprise inspeksyon sa lain-laing police station sa probinsya iyang nakita ang daghang problema nga nasugatan. (BANAT NEWS)