DILG makasugyot lang - Comendador
CEBU, Philippines - Gitin-aw ni Sr. Supt. Patrocinio Comendador, hepe sa Cebu Provincial Police Office (CPPO) nga bugtong ang ilang higher headquarters sa PNP (Kampo Crame) ang dunay katungod nga momando og red alert status.
Giluwatan ni Comendador ang iyang reaksyon human si Department of Interior and Local Government (DILG)-7 Pedro Noval mimando sa kapulisan nga ipaubos sa red alert ang lungsod sa Compostela.
Kini human nakadawat og report si Noval nga nagplanong gubton sa mga supporters ni Mayor-elect Joel Quinio.
“Alert order should be coming from higher headquarters,” pasabot pang Comendador.
Hinuon matud pa niya nga mahimong mosugyot lang si Noval ngadto sa kapulisan kun unsay angayang himuon sa pagpatuman sa higpit nga seguridad. Gitataw niini nga andam silang moresponde sa Compostela kun moulbo gyud ang kagubot sa maong lungsod.
Gani hangtud karun gipabilin pang Comendador ang augmentation gikan sa Regional Public Safety Batallion (RPSB)-7 kanhi Regional Mobile Group (RMG) didto sa naasoy’ng lungsod. Gawas pa niini gimanduan usab niya ang mga hepe sa kapulisan sa kasikbit nga lungsod nga moresponde dayun kun mohimo’g kagubot ang mga supporters ni Quiño.
Si Quiño maoy gideklarar sa Comelec nga midaog sa nakalabay’ng eleksyon apan wala makalingkod tungod sa petisyon ni kanhi mayor Ritchie Wagas didto sa Comelec en Banc. (BANAT NEWS)
- Latest
- Trending
