12 brgy way MRF makasuhan

CEBU, Philippines -  Kaso ang atubangon sa 12 ka mga barangay sa dakbayan kung mapakyas sila paghimo sa ilang kaugalingong Material Recovery Facilities (MRF) sa ilang dapit alang sa paglain sa basura.

Kini ang bahad nila ni Atty. Benjamin Cabrido, ug Engr. Ricardo Mendoza sa Solid Waste Management sa dakbayan sa Mandaue.

Matud pa ni Mendoza 12 na lamang sa 27 ka barangay sa dakbayan sa Mandaue ang wala pa gihapoy MRF bisan pa sa gahin nga gihatag kanila sa dakbayan sa Mandaue ug ni Cebu Gov. Gwendolyn Garcia nga mokabat sa P150 mil alang sa katukoran sa MRF.

Si Cabrido nagduda kung hain na ang maong gahin nga niadto pang milabay’ng tuig gihatag. Nasuta sa Banat News nga ang mga barangay nga wala pa makahimo sa MRF mao ang Brgy. Looc, Umapad, Opao, Tipolo, Maguikay, Guizo, Tingob, Paknaan, Subangdako, Basak ug Cabangcalan.

Mibahad si Cabrido nga siya mismo ang mopasaka og kaso batok sa mga kapitan kung mapakyas sa paghimo og MRF sa ilang lugar.

Ang pipila sa mga barangay nga wala pa katukod og MRF nangangkong padayon pa silang nakig-negosasyon sa tag-iya sa mga luna nga butangan nila sa ilang MRF.(EIM)(BANAT NEWS)