Hubog nga Koreano napakgang paghikog

CEBU, Philippines -  Swerte nga nasakpan ang usa ka Koreano nga padulong na untang magpakamatay sulod sa usa ka KTV bar sa dalan A.S Fortuna dakbayan sa Mandaue kagahapon sa kaadlawon.

Ang buot untang magpakamatay mao si Lee Sung Jae, alyas James Lee, ug usa ka Korean national ug trabahante ug stay-in sa maong establisamento.

Si Yang Bing Young, ang tag-iya sa NASA Disco Club and KTV mitug-an sa kapolisan nga samtang anaa siya sulod sa usa ka lawak sa ilang KTV bar kalit misulod si Lee ug miinom sa ilang bino nga giinom.

Bisan og wala makaila si Yang sa maong Koreano iya nalang kining gipasagdan gumikan sa kahubog niini.

Pipila ka gutlo ang milabay nakalitan si Yang sa dihang kalit kini mikuha sa usa ka nylon nga pisi ug gihikot kini sa iyang liog ug dayong pangita og kahiktan niini sa kisame kay buot magpakamatay.

Si Yang daling nangayo og tabang sa iyang mga sakop ug ilang gipugngan si Lee sa iyang tinguhang magpakamatay ug gidala sa kapolisan.

Sa imbestigasyon ni SPO1 Emmanuel Enolpe sa Station 4 wala motug-an si Lee sa iyang motibo nga nagtukmod kaniya sa paghikog, kasuhan unta og trespassing si Lee apan nasuta nga stay-in worker kini nga wala mailhi sa tag-iya.

Nagduda si SPO1 Enolpe nga dako ang problema nga gisagubang ni Lee hinungdan nga buot kining magtubok sa iyang kaugalingon. (EIM)(BANAT NEWS)