High-powered firearms nasakmit
CEBU, Philippines - Katorse ka nagkalain-laing klase sa armas walo niini high powered firearms ang nasakmit sa Criminal Investigation and Detection Group (CIDG)-7 atol sa entrapment operation sa dakbayan sa Danao niadtong Miyerkules sa gabii.
Apan duha ka giingong ‘runners’ ang nakaikyas human nakabantay sa mga awtoridad apan usa kanila ang nailhan nga si Marcing Batulan sumala pa ni Chief Inspector Ricky Neron.
Si Neron nga maoy nangulo sa operasyon nagkanayon nga si Batulan naila na kaayong gunrunner dinhi sa dakbayan ug probinsya sa Sugbu hinungdan nga ilaha kining gisuwayan nga palitan.
Ang mga armas nga nagkantidad tanan og P300,000 mao ang usa ka KG9 machine pistol, Ingram machine pistol, duha ka .45 pistol, upat ka .357 revolvers nga lakip sa gikunsiderar nga high-powered firearms.
Laing mga armas nga nakuha mao ang tulo ka .38 snub nose revolver, tulo ka .22 magnum revolver, ug klase-klase nga magazines.
Si Sr. Supt. Jose Pante, hepe sa maong buhatan mimando kang Neron nga moumol og team human siya nakadawat og impormasyon gikan sa concerned citizen may labot sa kalihokan ni Batulan.
Matud pa ni Neron duha ka semana nilang gipanid-an ang kalihokan ni Batulan ug niadtong Miyerkules ilang gihimo ang entrapment operation sa barangay Ylaya, Danao City.
Matud pang Neron atol sa entrapment ilang gisigurong makuptan ang tanang armas aron dili magamit ni Batulan ug kauban batok kanila apan nakaipsot hinuon ang duha. (EIM)(BANAT NEWS)
- Latest
- Trending
