Santos gimonitor human kasohi

CEBU, Philippines - Gipagawas na kagahapon sa Provincial Prosecutor’s Office ang resolusyon sa kasong kidnapping with homicide batok kang Bella Ruby Santos ug sa uyab niyang si Ian Charles Griffiths. Ang maong resolusyon sa kaso giduso na ngadto sa korte tungod kay nasuta nga duna kini lig-ong sukaranan.

Sa tipik sa rekomendasyon sa kaso nagkanayon nga “there is probable cause that the crime of kidnapping with homicide was committed.”

Sila si Prosecutor II Jose Edwin Renegado, Anabelle Robles ug Maria Luisa Ong, Assistant Prosecuting Attorney I, maoy mirekomendar sa pagduso sa maong kaso ngadto sa korte uban usab sa pag-uyon ni Assistant Provincial Prosecutor Joseph Berciles.

Samtang si Renante Pique, ang amahan sa 6-anyos nga si Ellah Joy sa report sa TV Patrol Central Visayas mipadayag sa iyang kalipay nga mibanagbanag na ang hustisya sa kamatayon sa iyang anak.

Gibutyag ni Renante nga wala pa sila magkakita sa ilang abogado ug sa kapolisan nga naghupot sa kaso.

Giangkon ni Renante nga gibati siya og kabalaka sa sayo pa kay basin mapareha ang hitabo niadtong napasakaan og kaso ngadto sa korte si Karen Esdrelon ug sa pamanhonon niining si Sven Erik Berger kaniadto.

Kahinumdoman nga si Esdrelon ug Berger maoy unang gitumbok nga suspetsado sa pagdagit ug pagpatay kang Ellah Joy apan ang kaso batok sa duha gibasura sa korte human sila makapakita og mga lig-on nga ebidensiya nga wala silay kalambigitan sa maong krimen.

Samtang sa bahin ni Santos mipasalig kining atubangon nila ang maong kaso sa walay kahadlok tungod kay wala silay sala.

Miingon siya nga wala usab sa iyang hunahuna ang pag-ikyas aron likayan ang maong kaso tungod kay alang kaniya limpyo ang iyang konsensya nga wala gayud nila patya ang bata nga si Ellah Joy Pique.