CEBU, Philippines - Usa ka negosyanteng igsoon sa retiradong heneral sa kapolisan ug inilang abogado sa Sugbo, gidunggab og ka-30 ka higayon sa iyang “boy” nga gisuspetsahang mitulis sa iyang amo didto sa iyang pinuy-anan sa dalan 2nd Street sa Dona Rosario Village, barangay Labogon, dakbayan sa Mandaue.
Ang biktima mao si Henry dela Victoria Quiñanola, 68, nga nagpuyo sa nahisgotang subdivision ug igsoon ni Retired Police General ug Atty. Frits Quiñanola.
Si SPO1 Danilo Barrita miila sa suspetsado nga nagdunggab patay sa biktima nga si Jimmy Omambac Ruiz, 20, nga usa ka stay-in helper sa delivery truck sa biktima, nga lumad nga taga sitio Catadman, barangay Turno sa dakbayan sa Dipolog.
Matud pa ni SPO1 Barrita nga ang suspetsado unang nadakpan sa guard on duty sa maong subdivision nga si Isagani Labitan, 45, kinsa mao usab ang nanawag sa ilang buhatan alang sa pagtahan sa suspetsado ngadto kanila.
Dugang pa niya nga ang suspetsado unang miduol sa ilang silingan nga si Hans Edrian Perez, 28, sa tuyo nga manghulam og kuwarta nga iyang iplete pauli sa Dipolog human niya patya ang iyang amo.
Si Adrian nga gibati og katingala sa pagpanghulam og kuwarta ni Ruiz dali nga nakatawag sa ilang guwardiya sa subdivision nga si Labitan kinsa miposas gilayon kang Ruiz human masuta nga gipatay ang agalon niini.
Si SPO1 Barrita miingon nga sa paghiling sa patay’ng lawas sa maong negosyante ilang nasuta nga may 30 kini dinunggaban nga maoy nakaingon sa hinanali niining kamatayon.
Sa dihang giimbistigar, ang suspetsado mitug-an nga nawad-an siya sa maayong panghunahuna tungod sa iyang kapungot nga gibati sa biktima nga wala mohatag og pagtugot kaniya nga mopauli sa iyang pinuy-anan.
Hinuon giangkon sa suspetsado nga igo lamang kining nakatungha sa elementarya sa didto pa siya sa ilang lungsod sa Mindanao ug ang biktima na maoy nagpatungha kaniya sa kursong automotive mechanic.
Si SPO1 Barrita miingon nga naglakip sa nahipos nilang mga ebidensiya mao ang screw driver nga maoy gigamit sa pagdunggab patay sa biktima, duha ka cellphone ug ang pitaka sa biktima.
Dugang pa ni SPO1 Barrita nga ilang gitan-aw ang anggulo nga pagpanulis tungod sa kuwarta nga ilang nakuha gikan sa suspetsado nga ilang gituohang iya sa biktima human kini patya. - BANAT NEWS