CEBU, Philippines - Gipasakaan og kasong kalapasan sa ilegal nga pagpamaligya og ilegal nga drugas ang British national ug Sugboanon niining hinigugma nga nadakpan sa buy-bust operation sa kapolisan sa Mandaue City Police Office (MCPO) sa miaging semana.
Ang gipasakaan og kaso mao si Kevin Felix Heins Andrew Thuber, 52, ug Anna Morena Manas, 28, nga nagpuyo sa dakbayan sa Lapulapu ug nanag-iya sa International Videoke Bar sa barangay Mantuyong, dakbayan sa Mandaue.
Si Superintendent James Goforth, deputy director for operation sa Mandaue City Police Office (MCPO) dihang nahinabi sa Banat News miingon niadtong Martes napasaka ang kaso.
Ang duha nadakpang namaligya og ecstasy sa mga sakop sa City Anti Illegal Drug Special Task Force (CAIDSOTF) nga gipangulohan sa ilang hepe nga si Insp. Henrix Bancoleta maoy nakadakop sa mga suspetsado atol sa buy-bust operation nga gihimo.
Ang pagdakop natigayon human usab sa pipila ka adlaw nga pagpaniid sa ilegal nga kalihukan sa mga suspetsado pinaagi sa pagpamailgya niini ngadto sa ilang mga kustomer. - BANAT NEWS