CEBU, Philippines - Ang buhatan sa Provincial Planning and Development mipahibawo nga miabot na og 64 ka water work systems o proyekto sa patubig ang napatukod sa lalawigan sa Sugbu.
Sumala pa sa labaw nga opisyal sa Provincial Planning and Development Office nga si Engr. Adolfo Quiroga nga sukad sa tuig 2004 hangtud na sa tuig 2011, 59 na ka mga water works system ang operational ug napahimuslan na sa nagpuyo sa mga kalungsuran.
Gawas niini, si Quiroga miingon nga sa pagpakakaron may bag-ong nahuman nga pito ka mga water works project nga gipadali ni Gov. Gwendolyn Garcia karong tuiga.
Iya usab gibutyag nga laing pito ka water works projects ang gikatakda usab nga pagasugdan niining second quarter sa tuig 2011.
Gawas niini si Quiroga mitug-an nga sa tuig 2010, mikabat sa 5,187 ka mga poste alang sa mga sugang dagitabnon ang giapud-apod sa matag sitio sa kalungsuran. - BANAT NEWS