CEBU, Philippines - Wala pa gihapon mailhi ang gituohang gi-salvage nga babaye nga napalgan ang patay’ng lawas niini nga nagbuy-od sa kalibunan sa sitio Poso Center sa barangay Mactan, dakbayan sa Lapulapu niadtong miaging Lunes sa buntag.
Si SPO3 Jesus Gemenia sa Homicide Section sa kapolisan sa maong dakbayan nga nahinabi sa Banat News miingon nga adunay mihimo og mga pakisusi nga mga tawo sa ilang buhatan labot sa napalgang patay’ng lawas nga babaye.
Apan dihang gisud-ong ang patay’ng lawas nga kasamtangan karong gipahimutang sa usa ka punerarya sa maong dakbayan dili kini mao ang gipangita nga sakop sakop sa pamilya.
Matud pa ni Gemenia nga magpabilin pa nga dili maila ang mga responsable sa kamatayon sa biktima tungod kay dili pa man sila makakuha og mga giya alang sa pakisusi nga ilang pagahimuon tungod kay wala silay inisyal nga kakuhaan og impormasyon kabahin sa pagkatawo sa biktima. Ang maong babaye gipusil tulo ka higayon sa ulo nga maoy nakaingon sa hinanali niining kamatayon. - BANAT NEWS