Polis gitudloan pagsuwat sa blotter

CEBU, Philippines - Gumikan sa ka daghang polis nga dili kaantigo sa pagsuwat og spot report , ang mga imbestigador sa nagkalain-laing police station sa probinsiya sa Sugbo gipaubos sa usa ka seminar ug gitudloan sila sa paggama og report ug sistema sa pagsuwat niini.

Mikabat sa 80 ka mga police investigator maoy mitambong sa Police Investigator Report and Writing System seminar niadtong Biyernes didto sa Kapitolyo. Ang nahisgutang seminar nagtudlo sa kapolisan sa pagpauswag sa ilang writing skills sa paggama og mga police report, blotter, investigation report ug uban pa.

Si Superintendent Teofilo Siclot, deputy provincial director for operation nagkanayon nga naobserbahan nila nga adunay mga police investigator nga problemado sa ilang paggama og mga spot report.

Gibutyag ni Siclot uban sa maong mga imbestigador dili kamao nga mosuwat ug kung makamao man gani lisod usab sabton ang ilang gisuwat.

Gawas sa nahisgutang seminar aduna pay laing seminar nga ipahigayon aron makakat-on gayud ang mga polis sa ilang mga trabaho.

Si Siclot mipahimangno sa kapolisan nga ang imbestigasyon maoy kinabuhi sa police station.

Niining ulahi lang, usa ka photo journalism seminar ang gipahigayon aron ang kapolisan mabansay sa maayong mga angle pagkuha og mga hulagway panahon sa mga insidente ug kalihukan. Si Siclot nanghinaot siya nga ang nakat-onan karon sa kapolisan magamit unta nila sa ilang mga trabaho. Brenda D. Batuto ug Ria Mae Y. Booc sa The Freeman/WC