Bimbo gisuportahan sa mga higala

CEBU, Philippines - Gatosan ka mga molupyo sa Sitio Naba, Barangay Mambaling ang midangop kagahapon sa buhatan sa Pagtambayayong Foundation Incorporated aron pagpakita sa ilang simpatiya ngadto sa presidente sa maong foundation nga si Bimbo Fernandez kinsa giplanohan nga ikiha sa siyudad sa Sugbo gumikan sa pipila ka mga reklamo sa mga kliyente niini kinsa giingong nakaangkon og mga estrakturang bati.

Nagkanayon ang usa sa mga residente sa Sitio, Naba Mambaling nga si Carlito Ybañez nga tarong ang nadawat nila nga serbisyo gikan sa Pagtambayayong ug gani wala sila pabayra niini sa nadawat nila nga unit human masunog ang ilang lugar niadtong 2005 ug 2009.

Sumala pa ni Ybañez nga wala mahimuot ang iyang grupo bahin sa balita nga ikiha si Fernandez sa siyudad.

Samtang si Fernandez nagkanayon nga posibleng panimalos lang kini sa kampo ni Mayor Michael Rama kinsa ilang gikiha dili pa lang dugay gumikan sa isyu sa clearing operation sa Mahiga Creek.

“ Bisan muana pa siya nga dili panimalos, maklaro man gud nimo kung unsa ang tumong.Iyaha pud nang opinyon kung muana siya nga dili panimalos ang iyang gibuhat,” suma pa ni Fernnadez sa dihang nahinabi sa Banat News kagahapon.  - BANAT NEWS