CEBU, Philippines - Gisugyot ni kanhi Dangerous Drugs Board undersecretary Paul Clarence Oaminal ngadto sa kagamhanan sa dakbayan sa Sugbo nga inay himuong sementeryo alang sa mga Protestante diha sa barangay Kalunasan mas maayo og tukuran nalang kini og bag-ong buhatan sa Cebu City Treatment Rehabilitation Center (CCTRC).
Si Oaminal mibutyag dihang nahinabi sa Banat News nga nagka-estoryahay na sila ni Konsehal Ronald Cuenco, ang nagrepresentar sa City Hospital Board kabahin sa tanyag pagpa-angay og rehabilitation center program alang sa mga nagumon sa bisyo sa ginadiling drugas dinhi sa dakbayan.
Masaligon si Oaminal nga mahitabo unta ang pagbalhin sa buhatan sa CCTRC didto sa Kalunasan sa higayon nga papahawaon na kini sa probinsiya nga maoy nanag-iya sa luna nga nahimutangan sa kasamtangang buhatan karun duol sa Cebu City Jail.
Gipadayag ni Oaminal ang iyang paghingusog pagpangita og luna nga katukoran sa balhinonon nga buhatan sa CCTRC tungod kay apektado ang gatusan ka mga drug dependents nga gipaubos karun sa rehabilitasyon sa higayon nga mapapahawa ang maong buhatan nga walay klarong relocation site.
Dugang ni Oaminal ang ulohang buhatan nga maoy nagdumala sa operasyon sa CCTRC naglisod pa hangtud ning mga tungora pagpangita og luna nga katukoran sa balhinan niini.
Si Oaminal nagtuo nga mapaminus ang suliran o ba kaha masumpo ang kreminalidad kun hingusgan ang kampanya batok sa drugas sama sa pagpa-rehab sa mga drug addicts aron magbag-o na sa ilang kinabuhi.
Subay sa nahipos nga rekord ni Oaminal 70 porsiyento sa mga nahitabong krimen may kalambigitan ang ginadiling drugas.(EIM)(BANAT NEWS)