Uyoan giuna'g luba sa pag-umangkon

CEBU, Philippines -  Usa ka tennis instructor ang nalandig sa tambalanan human kini dunggaba sa iyang pag-umangkon nga nasuko nga wala paliti og tsinilas didto sa Genes Compound, sa barangay Quiot ning dakbayan sa Sugbo sa miaging gabii.

Ang biktima mao si Fernando Singson, 26, partime tennis player instructor ug residente sa maong lugar, samtang ang suspetsado mao ra usab ang bayong-bayong ug 17-anyos niyang pag-umangkon, nga silingan sa biktima uban kang Shaquille Ibarra, 19, kinsa miikyas human sa hitabo.

Si SPO4 Rey Cuyos ug mga kauban sa Homicide Section mibutyag nga sa wala pa mahitabo ang biktima ug pag-umangkon nangita og karenderya aron manihapon.

Sa ilang pagpangaon ang pag-umangkon mihangyo nga magpapalit og tsinilas ug gipasaligan kini sa biktima nga palitan.

Unya miuna ang suspek sa paglakaw, apan sa pagpauli sa biktima naagian niini sa dalan ang suspek uban kang Ibarra ug iya kining giduol.

Apan kalit lamang giluba sa suspek ug ni Ibarra ang iyang dughan, human miikyas dayon ang duha. 

Bisan samaron sa dughan nakadagan pauli sa ilang balay ang biktima ug gihatod dayon siya sa Cebu City Medical Center.

Si PO3 Wetzel Berry sa Homicide Section nga nahinabi sa Banat News nagkanayon nga gusto lang pangwartahon sa pag-umangkon ang iyang uyoan hinungdan nga nagpasumangil kining magpapalit og tsinelas apan wala man hatagi sa biktima, nasuko ug giluba ang naulahi.

Sa pagkakaron padayon pang gipangita sa kapolisan ang mga suspetsado. (BANAT NEWS)