Tulo gipanunggab angol sa car washer

CEBU, Philippines -  Tulo ka tawo ang gipanunggab angol   sa usa ka” car washer “didto sa Sindulan St., sa barangay Mabolo , ning siyudad sa Sugbo sa miaging gabii.

Ang mga biktima mao sila si Allan Sinagan, 21, 3rd year college sa University of San Carlos ug kasamtangan nagpuyo sa maong lugar, apan lumad nga taga barangay Bato sa lungsod sa Santander, iyang ig-agaw nga si Jarold, hingkod, minyo, usa ka call center agent nga taga Bato, Santander ug si Ben Marie Dimaonahan, 30, usa ka technician nga residente gihapon sa maong lugar.

Samtang ang gitumbok nga suspetsado mao ang ginganlan og ‘Ekong’ nga silingan ra sa mga biktima sa Mabolo.

Si SPO4 Rey Cuyos ug mga kaubanan sa Homicide Section mibutyag nga si Dimaonahan ug mga kauban naglingkod-lingkod sa kilid sa usa ka tindahan sa maong lugar.

Samtang ang suspek naghugas sa sakyanan nga giparking daplin sa karsada kalit lang miduol kanila ug walay daghang langas gitagsa-tagsa sila sa pagpanunggab.

Unang nalubaan sa buko-buko mao si Allan , ug gisunod si Jarold, kinsa nasabak sa tiyan ug dayon si Dimaonahan kinsa nasabak usab sa walang dughan.

Ang mga biktima daling gihatod ngadto sa Perpetual Soccour Hospital diin duha kanila ang anaa sa talandugong kahimtang.

Si PO3 Wetzel Berry sa Homicide Section nga nahinabi sa Banat News nagkanayon sa wala pa mahitabo ang pagpanunggab nag-inom ang tulo ka mga biktima hangtod nianang alas -4:00 sa hapon nga gipanunggab sila. Padayon pang gipangita karon sa kapolisan ang suspetsado. (BANAT NEWS)