Lolo manglugos unta nakulatahan

CEBU, Philippines -  Way swerte ang usa ka 50-anyos nga lolo nga misuway unta sa pagpanglugos sa 29-anyos nga ginang tungod kay gawas nga nadakpan ug gitabangan kini og kulata sa mga estambay sa barangay Arpili sa lungsod sa Balamban niadtong Domingo sa alas 7:30 sa gabii. Ang suspek nga nakulatahan sa mga estambay ug nagtingkagol na karun sa karsel mao si Emilio Sario Jr., 50, molupyo sa dakbayan sa Toledo.

Samtang ang buot unta niyang biktimahon mao ang 29- anyos nga ginang nga taga barangay Buanoy nga nagtrabaho sa usa sa shipbuilding company sa maong lungsod.

Ang biktima nga nahinabi sa Banat News pinaagi sa telepono mitug-an nga gikan siya nag-overtime sa trabaho niadtong tungura nag-atang siya og masakyan dihang giduol sa suspek.

Ang suspek giingong nangutana kun asa siya mouli ug mitanyag kini nga maoy mohatud apan iyang gibalibaran ug milakaw ang biktima apan misunod kini ug pag-abot sa ngitngit ug mingaw nga lugar ug sa iyang kahadlok miaksyon na unta siya og dagan. Apan nakuptan siya niini ug gibira hinungdan nga sila naglinayogay ug nangatumba ug naligid-ligid sa pilapilan paubos ug didto gidat-ogan siya sa maong suspek.

Tungod kay nasayod siyang wala siyay dag-anan dihang girubo-rubo na siya sa suspek ug gipaak pa ang iyang ngabil aron pugngan siya sa pagsinggit gigamit sa biktima ang iyang utok ug giestoryahan ang suspek kung unsay gusto niini.

Ang suspek nga nadala usab sa taktika sa biktima daling mitubag nga buot lang kining makighilawas, dali usab gitubag sa biktima nga dili na kinahanglang ipaagi sa pwersa ug giingnan kining mopahimutang sila sa maayong lugar.

Ang suspek nga sa una mituo sa biktima daw di na makapaabot subling gilayog ang ginang ug gipasandig sa punoan sa kahoy dihang mibalik na sila og saka padulong sa karsada. Niining tungura gisampungan sa suspek ang baba sa biktima hinungdan nga giingkib kini sa ginang nga nakapaping-it sa suspek, swerteng adunay usa ka lalaking nahiagi ug nakadungog sa komosyon ug sa pagsiyagit sa biktima dali kining miduol.

Ang suspek midagan pagkakita sa lalaki apan gigukod kini sa biktima uban ang maong lalaki hangtud nga naabot sila sa dapit nga dunay mga estambay nga miapil usab sa paggukod ug naabtan ang suspek ug gitabangan kini og kulata pagkasayod sa buot unta niining buhaton sa ginang.

Si PO3 Julius Obana sa Balamban Police Station nagkanayon nga ila nang gihikay ang kaso batok sa maong suspek. (BANAT NEWS)