Taga Pagsabungan gustong magpatigbakay

CEBU, Philippines - Gitinguha karon sa konseho sa barangay Pagsabungan sa dakbayan sa Mandaue nga kahatagan sila og pagtugot sa kagamhanan sa dakbayan nga “makapasabong” sila matag buwan.

Ang usa ka resolusyon sa barangay kalabot niini atua na sa konseho sa dakbayan sa Mandaue ug kang Mayor Jonas Cortes. Si Kapitan Andres Suson nga maoy barangay kapitan sa barangay Pagsabungan mipasabot nga dugay na siyang nasayod nga ang ilang barangay gitawag nga “cockfighting capital” sa mga silingang barangay sukad pa kaniadto sa wala pa ang “Ikaduha nga Gubat sa Kalibutan.”

Matud pa niya nga mao kini ang hinungdan nga ang maong barangay ginganlan usab sa ngalan nga “Pagsabungan” nga gikuha usab gikan sa ngalan nga sabong.

Ang pagkainila sa sabong sa barangay Pagsabungan sa dakbayan sa Mandaue nahimo gumikan sa pagka-maayo og kalidad sa mga   manok igtatari nga gigam usab sa mga maayong laki nga breeder sa maong lugar.

Sa nasayran, higpit ang balaod nga nagdili sa taga barangay nga makapahigayon og tigbakay o sabong sanglit gitugot lamang kining maong kalingawan sa mga bulangan sa dakbayan.

Ang maong matang sa kalingawan gitugot lamang sa barangay sa panahon sa kasaulogan sa tinuig nga piyesta sa ilang kapilya. (BANAT NEWS)