Mananagat nalumos

CEBU, Philippines - Patay nang napalgan kagahapon sa buntag ang usa ka 60-anyos nga mananagat kinsa giingong nalumos sa kadagatan sa barangay Dungoan, dakbayan sa Danao.

Ang nalumos giila sa kapolisan nga si Guillermo Capul, taga barangay Upper Natimahuan, lungsod sa Carmen.

Napalgan kini sa mga polis nga naglutaw sa dagat nga wala nay kinabuhi sa likod nga bahin sa usa ka sugar mill factory.

Gikataho nga si Capul mibiya sa ilang balay mga alas 3:00 sa hapon niadtong Sabado aron managat uban sa iyang mga silingan nga sila si Isidro Camingawan ug Domiano Diongco pulos hingkod ang panuigon.

Kagahapon sayo sa buntag si Camingawan ug Diongco maoy nahibalik sa ilang lugar.

Si Camingawan mibutyag nga samtang nanagat sila si Capul milangoy ug kalit lang nga nahanaw hinungdan nga ilang gipangita apan wala na nila kini hikit-i.

Ang asawa ni Capul mao nay mi-report sa kapolisan kagahapon sa buntag sa maong insidente. (BANAT NEWS)