Namaligya'g Ecstacy

CEBU, Philippines - Usa ka British national ug ang iyang uyab nga Filipina ang gidakop human gipasanginlang namaligya og gidudahang tabletas nga ecstacy atol sa gipahigayong buy-bust operation sa kapolisan kagahapon sa kaadlawon diha sa usa ka disco bar sa barangay Mantuyong, dakbayan sa Mandaue.

Ang suspetsado mao si Kevin Heins Tauber, 52, ug ang iyang uyab nga si Anna Manas, 28, parehong nagpuyo diha sa barangay Marigondon, dakbayan sa Lapu-Lapu.

Si Inspector Henrix Bancoleta, kinsa maoy nangulo sa operasyon mibutyag nga mga pasado alas 3:00 kagahapon sa kaadlawon mipahigayon sila og buy-bust operation diha sa International Bar Complex nga gipanag-iya sa maong langyaw.

Matud ni Bancoleta nga usa ka police decoy ang gihimo nilang poseur buyer nga mipalit kunohay og ecstacy nga nagkantidad og P1,000 .

Giingong si Manas maoy giingong miatubang sa police decoy diha sa usa ka lamesa sa maong bar gipahigayon ang ilang transaksiyon, sumala pa sa kapolisan si Manas mibarog ug miduol ngadto kang Tauber ug ang naulahi mitunol sa maong tabletas.

Tungod niini daling giaresto ang duha ug nakuha usab kanila ang usa ka cellular phone nga gituohang gigamit sa ilegal nga transaksiyon, gikuha usab ang mga passports sa duha.

Gawas niini na-recover usab sa mga polis ang unom ka plastik nga pakete nga dunay sulod nga 15 ngadto sa 20 ka mga gidudahang tabletas nga ecstacy.

Matud ni Bancoleta nga ang matag usa ka tabletas nagkantidad gikan sa P1,000 ngadto sa P2,000 depende sa brand niini.

Gikataho usab nga dunay nahitabong gamay’ng kaguliyang sa sulod sa bar dihang ang mga dancer nag-alibwag og panagan sa pagtuo nga gironda ang bar ug pangsikopon sila.

Gibutyag usab ni Bancoleta nga mikabat ngadto sa usa ka buwan ang ilang pagpaniid sa mga suspetsado una sila mipahigayon og pagpangronda.

Si Tauber temporaryong gidetiner sa Centro Police Station samtang si Manas atoa magtingkagol sa Subangdaku Police Station detention cell.

Ang duha mag-atubang og kasong pagpamaligya og ginadiling drugas nga ipasaka sa mga polis batok kanila karong Martes. (EIM) (BANAT NEWS)