Manag-uyab gitulis

CEBU, Philippines -  Dul-ang P100 ang kinatibuk-ang kantidad sa kwarta ug mga mahalong butang nga nasakiyo sa wala hiilhing armadong mga tawo nga mitulis sa duha ka mga batan-on nga gituohang maghigugmaay didto sa Garden Bloom Accress, barangay Pitogo, lungsod sa Consolacion kagahapon sa alas 3:45 sa kaadlawon.

Ang mga biktima mao sila si Zeigfred Tumala, 27, ulitawo, nga nagpuyo sa nahisgutang lugar, ug ang kauban niini nga si Cristina Gutierrez, 26, dalaga, nga taga dalan D. Jakosalem ning dakbayan sa Sugbo.

Sumala sa mga biktima nga nag-atang sila og sakyanan paingon sa Daanbantayan dihang kalit lang mihunong sa ilang atubangan ang usa ka motorsiklo nga kolor itom ug puti nga gisakyan sa duha ka wala hiilhing mga batan-ong lalaki.

Unya ang nag-angkas sa luyo maoy nanaog uban sa pagtion kanila sa iyang armas de fuego nga wala hisayri ang kalibre ug mideklarar nga tulis.

Gumikan sa kabalaka nga pusilon sila, wala sila makalihok dihang gikuha ang ilang digital camera nga nagkantidad og P45 mil , P6 mil nga kuwarta, 4 ka cellhpone, Swiss bag, mga senina, shoulder bag, mga ATM card ug credit card, eyeglasses ug I.D. sa University of Cebu (UC).

Human makuha ang maong mga butang misirit dayon pahilayo ang maong mga tulisan ug walay laing nahimo ang mga biktima gawas sa pagdangop ngadto sa kapolisan.

Sa pagkakaron padayon pang gipanid-an sa kapolisan ang maong mga tulisan. (BANAT NEWS)