CCAIB naniid sa internetan

CEBU, Philippines -  Midangop karon ang Cebu City Anti-Indecency Board (CCAIB) ngadto sa mga opisyales sa barangay ug miawhag sa ilang kooperasyon sa paggukod sa mga internet café nga nagbukas og mga pornographic site.

Matud pa sa tsirman sa CCAIB nga si Dr. Lucille Mercado nga importante kaayo ang kooperasyon sa barangay sanglit sila maoy unang makahibalo kung adunay dili maayong gibuhat ang internet café nga nagbase sa ilang hurisdiksyon.

Mihangyo si Mercado ngadto sa mga nagnegosyo og internet café nga kinahanglang i-lock gyud nila ang mga pornographic site sa ilang unit.

Matag higayong mopahigayon sila og kinalit nga panginspeksyon magdala gyud sila og mga information technology (IT) expert aron masuta kung naka-lock ba o wala ang mga pornographic site sa ilang unit.

Matud pa ni Mercado nga iyang nabantayan nga nagbaha karon ang mga kabatan-onan nga mosulod og internet café ug dili siya buot nga makasinati sila sa malaw-ay nga mga butang.

Sumala pa niya nga adunay ubang negosyante ang dili mo-lock sa pornographic site sa ilang unit gumikan kay kuwarta ra ang ilang gipalabi ug wala maghunahuna sa posibleng sangpotanan niini ngadto sa ilang mga customer. (/WC)  (BANAT NEWS)