Cybersex sa Talisay gipanid-an

CEBU, Philippines -  Gitutokan karon sa kapolisan sa dakbayan sa Talisay ang mga internetan sa maong dakbayan aron masanta ang mga eskandalo nga may labot sa cybersex.

Si Chief Inspector Eddie Recamara nga nahinabi sa Banat News kagahapon mibutyag nga may gipanid-an sila karong internetan ug mga pribadong residensiya sa dakbayan sa Talisay kinsa giingong dunay kalihukan sa cybersex.

Matud niya nga si Inspector Margienette Yosores maoy iyang tahasan nga mokuha og dugang pang impormasyon kabahin sa iyang nadawat nga report.

Base sa report nga adunay usa ka langyaw kinsa maoy manghaylo og mga menor de edad nga mga babaye nga dad-on ngadto sa iyang balay apan matud ni Recamara nga nagkinahanglan pa og kompirmasyon kung ang maong langyaw nagdumala ba og cybersex diha sa iyang balay.

Gawas niini dunay report nga adunay mga internet café sa siyudad nga dunay private room diin adto didto ipahigayon ang cybersex apan ikompirma pa usab kini sa kapolisan.

Kahinumdoman nga ang 6-anyos nga si Ellah Joy Pique kinsa gidagit ug gipatay sa miaging buwan gituohang dunay kalambigitan sa cybersex ang maong hitabo.

Hangtod karon ang kaso ni Pique padayon pang gihusay kinsa niining ulahi si Bella Ruby Santos ug ang uyab niining langyaw ang gipasanginlang adunay kalambigitan sa pagdagit ug pagpatay sa bata. (/WC)  (BANAT NEWS)