Truck boy giluba patay

CEBU, Philippines -  Patay ang usa ka tawo nga biktima sa pagpanunggab alas-5 pasado ang takna sa miaging hapon sa reclamation area sa barangay Subangdaku, dakbayan sa Mandaue.

Ang biktima mao si Vicente Rivera, 24 , taga barangay Sagay, lungsod sa Borbon ug stay-in helper mechanic sa usa ka trucking company nga nahimutang sa maong dapit.

Padayon pang giila sa kapolisan kung si kinsa ang mamumuno niini nga gihulagway lang nga kasarangan ang gidak-on ug gibabanabanang anaa sa 30 paubos ang panuigon.

Si PO3 Rommel Lim sa Investigation Detection and Management Bureau (IDMB) nga nahinabi sa Banat News miingon nga gikan nakig-inom ang biktima sa mga kauban sa trabaho dihang miabot ang gikatahapan nga nagsul-ob og itom nga jacket ug mitawag sa biktima.Matud pa nga dunay giestoryahan ang duha hangtud nga milakaw ang maong lalaki apan pipila ka gutlo pa ang nakalabay mibalik ang maong lalaki ug gitawag na usab ang biktima apan wala magdugay nakadungog na og komosyon ang mga kainom sa biktima ug dihang ilang gisusi nahagba na kini sa yuta.

Ang biktima nadunggaban sa walang bahin sa bukton nga milahos sa iyang ilok nga maoy gituohang nakaingon sa hinanali niining kamatayon.

Padayon pa ang imbestigasyon sa kapolisan pagtino sa motibo sa maong krimen.( /EIM) (BANAT NEWS)