Vendors: Talisay officials ipa-lifestyle check

CEBU, Philippines -  Mga vendor diha sa merkado publiko sa Tabunok, dakbayan sa Talisay nasagmuyo sa mga nanggawas nga pagsaway kanila nga nag-ingong ‘dili sila mamatay sa kagutom’ kung sila ibalhin sa bag-ong merkado publiko diha sa barangay Lagtang.

Gihagit hinuon nila ang tanang mga opisyal sa siyudad nga mopaubos sa lifestyle check aron masuta ang ilang kahimtang sa pamuyo kung wala ba sila mangurakot.

Una na nilang gipanawagan ang pagpakanaog sa pwesto nila ni Mayor Socrates Fernandez ug Bise Mayor Allan Bucao.

Usa sa vendor og karne kinsa nagdumili sa pagpabutyag sa iyang pangalan miangkon nga tinuod duna siya’y sakyanan nga sports utility vehicle (SUV) apan hinagoan nila kini aron makabaton sa maong butang.

Matud usab sa maong vendor nga kung nagmaneho man sila og mahalon nga sakyanan ug nagpuyo og dakong balay kini tungod sa ilang paghago diha sa merkado.

“Kaadlawon pa magmata na mi para maninda. Unya kana sila (mga opisyal sa city hall) maglingkod-lingkod lang diha sa city hall, pero karon pwerte na kadaghan og mga balay, mahibulong nalang ta asa na gikan,” matud sa maong vendor.

Ang maong reaksiyon mitumaw dihang dunay mga opisyal nga dili motuo sa mga pangangkon sa mga vendors nga magutman sila kung ibalhin ngadto sa bag-ong merkado sa barangay Lagtang tungod kay dili pabor ang maong lugar sa mga mamalitay.

Nakita sa mga opisyal nga ang mga vendors nagsakay og mga mahalong sakyanan ug nagpuyo diha sa mga subdivision.

Apan bisan pa sa pagdumili sa mga vendors sa Tabunok sa pagbalhin ngadto sa Lagtang ang kagamhanan sa siyudad hugtanon na sa ilang plano. Karong Hunyo 28, 2011 ang tagal sa siyudad nga ang mga vendors diha sa merkado sa Tabunok mabalhin na ngadto sa bag-ong merkado sa Lagtang.

Ang kagamhanan sa siyudad mituman sa mga yangungo sa mga vendors sa ilang pagbalhin ngadto sa bag-ong merkado sama sa pag-rerouting sa mga traysikol aron makaagi sa bag-ong merkado ug dugang mga stalls tungod sa reklamo nilang kuwangon ang gihimong mga stalls.

Apan bisan pa man gihimo na sa dakbayan ang ilang gipangayo dili gihapon sila buot mobalhin tungod na pud sa kabalaka nga mohinay ang ilang halin.

Si Talisay City Councilor Celiapo Cabuenas mibutyag nga usa ka pribadong indibidwal nga si Diosdado Larawan tag-iya sa lote duol sa merkado sa Lagtang miuyon sa hangyo sa siyudad nga gamiton ang iyang lote isip temporaryong terminal sa mga traysikol.( EM)  (BANAT NEWS)