CEBU, Philippines - Miduaw sa buhatan ni Governadora Gwendolyn Garcia ang mga volunteer consultant sa US Peace Corps (UPC) sa miaging adlaw.
Sila si Milosil Cruz ug mga kauban nga sila Leah Eggers, Claire Pelley ug Tylor Pickle miingon nga ang ilang pagbisita ni Gobernador Garcia maoy pagpadayag nila sa ilang suporta sa mga nag-unang programa sa probinsiya ilabina sa mga programa alang sa kababayen-an, kabataan ug pamilya.
Gihangop usab sa gobernador ang pagpaluyo sa nahisgutang grupo kay makapalig-on man kini sa iyang programa ilabina sa pagprotiher sa dungog a kababayen-an ug kabataan.
Tungod niini ang gobernadora mitakda dayon og tigum alang sa mga Local Chief executive dinhi sa probinsiya sa Sugbo aron maatiman dayon ang mga volunteer sa UPC.
Mas labaw nga gikalipay sa gobernador dihang iyang nadunggan nga nag-Binisaya ang maong mga langyaw nga nakighinabi kaniya.
Sa nasayran, ang UPC may mga programa nga gipatuman dinhi sa lalawigan sa Sugbo nga naglangkob sa Children and Family, Education ug Abandoned children.
Matud pa ni Eggers, usa sa maong mga boluntaryo nga ilang gitabangan ang mga Sugbuanon nga nagkalisod-lisod pinaagi sa paghatag og scholarship, microentrepreneur ug uban pa.
Samtang sa programa sa edukasyon, gipadayag usab sa laing boluntaryo sa UPC nga si Pelley nga usa siya sa mga magtutudlo og English journalism, sa usa sa mga taud-taod nga giugmad pag-ayo nga subject sa National High School sa Compostela.
Samtang si Pickle, laing boluntaryo nagkanayon nga iyang gitabangan ang mga batang biniyaan sa mga ginikanan sa lungsod sa Minglanilla.
Subay niining ilang suporta sa mga Sugboanon ang tulo ka mga UPC volunteer miingon nga ganahan kaayo silang mopuyo dinhi sa Sugbo.
Sa nasayran base sa pamahayag ni Cruz nga ang Sugbo maoy usa sa mga maayong partner sa ilang ruling program itandi sa ubang mga probinsya sa tibuok nasud. (BANAT NEWS)