15 ka private schools wa mobuhis

CEBU, Philippines - Human ipahibalo sa City Treasurer’s Office sa Mandaue nga posibleng matak-opan ang Cebu International Convention Center (CICC) tungod sa kapakyas pagbayad og buhis, laing 15 ka mga tunghaan usab sa mao gihapong dakbayan ang gipahimangnoan tungod sa wala pagbayad sa ilang business tax ug walay Mayors Permit gikan sa dakbayan sa Mandaue.

Kini ang pamahayag ni Mandaue City OIC City Treasurer Regal Oliva sa pakighinabi sa mga sakop sa media.

Matud pa ni Oliva ang 15 ka mga tunghaan pulos mga pribadong tunghaan gikan sa prep-school, elementarya, high school ngadto na sa kolehiyo.

Ang maong mga tunghaan base sa ilang record wala na magpakabana sa pagkuha og business permit sa city hall hinungdan nga wala usab kini makabayad sa ilang business taxes.

Giingong ang uban kanila milanat na og duha ngadto sa lima ka tuig na nga wala magtagad sa ilang obligasyon sa dakbayan apan nagpadayon sa pag-operate sa ilang mga tunghaan.

Bisan pa sa sunod-sunod nga notisya nga gipadangat sa dakbayan sa Mandaue kanila wala manumbaling ang mga tag-iya sa maong mga tunghaan.

Gikatakdang mopadala og final demand ang CTO sa maong mga tunghaan ug kinahanglang ila kining matubag sulod sa 15 ka adlaw ug kung mapakyas hayan nga ila kining irekomendar nga patak-opan. (BANAT NEWS)