CEBU, Philippines - Daghang mga dapit sa Metro Cebu ang gilunopan kagahapon sa hapon sugod alas-2 sa hapon pagbunok sa uwan dinala sa bagyong Egay nga miresulta sa pag-awas sa mga tubig diha sa mga kanal ug pagkatanggong sa liboang mga tawo. Ang mga lugar nga hilabihan nga naapektuhan sa kusog nga ulan mao ang downtown area(Colon), barangay Pari-an, Tejero, Carreta, Lorega San Miguel, dalan P. Del Rosario, Mabolo, Fuente Rotunda, Fuente Osmeña, Osmeña Blvd., Kamagayan, Sambag Uno ug T. Padilla ug uban pa.
Lakip sa gibahaan ang pipila ka mga lugar sa dakbayan sa Mandaue ug sa dakbayan sa Lapulapu.
Bisan ang barangay hall sa Kamagayan ug Sambag Uno gibisita usab sa baha tungod sa kataas sa tubig. Pipila ka mga sakyanan usab ang mitiurok tunga-tunga sa dalan human mapagngi sa ilang mga makina tungod sa kataas na sa tubig.
Samtang sa pakighinabi sa Banat News ni Joel Bargamento sa Drainage division sa City Engineering And Public Works nga ang ilang labaw gitawgan sa mayor aron sutaon ang basement nga bahin sa City Hall nga nasudlan usab og tubig.
Ang Philippine Atmospheric Geophysical and Astronomical Services Administration (PAG-ASA) mihulgaway usab nga ang kusog nga pag-ulan resulta lang sa nakasulod na nga bagyo sa nasud nga si Egay.
Sa pakighinabi sa Banat News ni Al Alcazar, weather observer mibutyag nga hasta ang Mindanao ug Eastern Visayas nakasinati og susamang kahimtang sa panahon.
Si Egay nakasulod na sa amihanang-kasadpang bahin sa sa Surigao nga adunay 300 kilometros samtang karung adlawa gituohan usab nga mosulod kini sa Boronggan Eastern Samar. Samtang ugmang adlawa (Domingo) gituohan usab nga si Egay makasulod na sa Virac Catanduanes nga adunay gikusgon nga 100 kilometros matag oras ug moirog ngadto sa Northeastern Aurora sa gikusgon nga 180 kilometros matag oras karong Lunes.
Matud pa ni Alcazar nga nipis ang posibilidad nga makasulod si Egay sa Sugbo apan mipahimangno kini sa mga residente daplin sa mga sapa, bukid ug dagat nga magmatngon.
Ang mga sakop sa kapolisan ug City Disaster Coordinating Council nagkatag na usab sa mga lugar kun asa ang mga lugar nga naapektuhan sa maong baha. (BANAT NEWS)