10 Most wanted pabutangan og patong sa ulo - CPPO

CEBU, Philippines - Ten most wanted person sa probinsya sa Sugbu ang irekomendar sa kapulisan nga pabutangan og patong sa ilang mga ulo ngadto sa kagamhanan sa lalawigan.

Si Supt. Teofilo Siclot Deputy Provincial Director for Operation (DPDO) sa Cebu Provincial Police Office nagkanayon nga magtigom pa karung sunod semana ang mga sakop sa Provincial Anti Criminality Task Force.

Hisgutan sa maong tigom ang kabahin sa reward money sa ten most wanted person sa probinsya kun pilay irekomendar nila nga patong sa ulo sa matag usa niini.

Kun aprobahan ang reward money sa kagamhanan sa probinsya ila kining ibutang ang napulo sa tarpaulin ug ipang apod-apod ngadto sa mga police stations sa kalungsoran ug siyudad.

Gipasabot ni Siclot ang reward money makapadasig sa mga impormante nga motabang sa mga awtoridad.

Ang napulo ka most wanted mao sila si Federito Regalado nga nag-atubang og kasong murder sa RTC Br. 59 sa Toledo City; Paulino Rosales, Rape sa RTC Br. 25 sa Danao; Sonny Macapaz, murder RTC Br. 59 sa Toledo; Roger Deloy, murder RTC Br. 25 sa Danao; Bryan Repuela, murder sa RTC Br. 60 sa Barili; Jerson Cohitmingaw, murder sa RTC Br. 55 sa Mandaue; Jay Mark Cuizon, murder sa RTC Br. 5 Cebu City; Manolito Aleonar, murder sa RTC Br. 24, Cebu City; Eliser Denoya, murder sa RTC Br. 59, Toledo; ug Melchor Batiller, murder sa RTC Br. 20 Cebu City.

Matud ni Siclot labing menus P50 mil ang ilang irekomendar nga patong sa ulo sa matag usa apan depende lang unya kini sa makab-ot nga kasabutan sa task force. (BANAT NEWS)