Napusilan sa 3-anyos nga anak

CEBU, Philippines - Nalandig sa tambalanan ang usa ka inahan human aksidenteng napusilan sa iyang 3-anyos nga anak lalaki sa dihang giduwaan sa bata ang improvised nga lantaka samtang natulog ang biktima sulod sa ilang pinuy-anan sa bukirang bahin sa barangay Mag-alwa sa lungsod sa Tuburan sa miaging buntag.

Ang anaa karun sa Vicente Sotto Memorial Medical Center (VSMMC) giilang si Carmelita Libongcogon, 46, kinsa nahiagom og samad pinusilan sa iyang ilong.

Matud pa nga natulog ang inahan sa ilang balay kuyog iyang 3-anyos nga anak nga niadtong tungora nagmata ang bata apan kalit napugwat sa iyang pagkatulog ang inahan sa dihang milanog ang buto.

Si Exequil Libongcogon, bana sa biktima nga nahinabi sa DyHP kagahapon sa buntag nagkanayon nga airgun ug dili lantaka ang nakaigo sa iyang asawa, nasuta usab sa katapusang pamahayag niini nga dyolen ang bala sa maong ‘airgun’ nga usa karon sa gibawal sa awtoridad.

Matud ni Exequil nga niadtong higayona didto siya sa umahan duol sa ilang balay ug gipahibawo nalang siya sa usa niya ka anak sa nahitabo.

Dali siyang mibalik sa balay ug iyang naabtan ang iyang asawa nga nagkadugo hinungdan nga gidali niya kini pagdala sa tambalanan.

Si Exequil nagkanayon nga wala gyud tuyoa sa ilang 3-anyos nga anak ug aksidente gyud ang nahitabo sanglit posibleng nasabdan ra kini sa anak.

Ang airgun gipanag-iya sa lain niyang anak nga 15-anyos lalaki nga maoy gamiton nga mamusil og ‘ihalas’ nga hayopan ug langgam sa bukid.

Ang Banat News misuway og kontak sa Tuburan Police Station aron manguha’g dugang kasayuran kabahin sa hitabo apan si PO2 Junyl Ater, desk officer sa Tuburan Police Station nagkanayon nga wala ma-blotter ang hitabo sa ilang buhatan.  - BANAT NEWS