CEBU, Philippines - Wala pa gihapon maestablisar kung gipatay ba o namatay sa balatian ang Israeli national sa sulod sa giabangan nga kwarto sa usa ka hotel sa downtown area niadtong Martes sa gabii nga maoy nakapalibog sa mga imbestigador sa Homicide Section.
Si Supt. Nestor Sator, medico legal officer ug pangulo sa PNP Crime Laboratory mitug-an sa mga tigbalita nga wala pa niya matino ang hinungdan sa kamatayon ni Max Efergan hangtud nga dili pa niya ma-examine og maayo ang ubang tissues sa lawas niini.
Matud ni Sator ang samad sa agtang ni Efergan dili agi sa hinagiban nga maoy unang gidudahan nga agi sa dinunggaban kundili tungod kay kini paingon na sa pagkadugta ang iyang lawas.
Dunay tulo ka rason nga gidudahan ang kapolisan sa kamatayon sa biktima kini naglakip sa drug intoxication, suffocation ug heart problem.
Matud ni Sator iyang namatikdan nga dunay problema sa sakit sa kasingkasing ang biktima. Iya pa usab eksaminon ang ubang parte sa lawas niini.
Siya midugang nga ang biktima namatay sulod na sa 72-oras una pa kini madiskubrehi gikan sa alas-4 sa hapon sa nakalabay’ng adlaw’ng Domingo.
Ang tiyan sa biktima duna pay daghang dugo ug namatay siya duha ka oras human siya nabusog sa iyang gikaon.
Hinuon si Sator ug ang kapulisan nagduda nga duna gyuy foul play ang kamatayon sa biktima apan dili pa siya makatumbok giunsa kini pagpatay ang biktima.
Ang patay’ng lawas sa biktima giputos og habol nga gipasok ilawom sa kama sa dihang nadiskobrehan sa mga empleyado sa hotel niadtong Martes sa gabii.
Si Senior Supt. Ramon Melvin Buenafe, hepe sa Cebu City Police Office (CCPO) nagkanayon nga si Efergan posibleng biktima sa poisoning, drugs, ug uban pa.
‘There is an indication of foul play because the body is wrapped,” matud pa ni Buenafe.
Matud ni Buenafe iya nang gipahibawo ang embahada sa Israel pinaagi sa foreign liaison officer sa Police Regional Office (PRO-7).
Mitataw siya nga ang iyang mga sakop walay nadawat nga impormasyon nga usa ka dautan si Efergan.
Ang Homicide Section mopadala og imbitasyon sa mga empleyado sa hotel ug ila usab imbitahon ang higala ni Efergan aron makakuha og dugang impormasyon.
Wala gihapon gisalikway sa kapulisan nga robbery ang motibo sa kamatayon sa biktima sanglit nahanaw naman ang iyang laptop, I-touch ug cash.
Si Chief Insp. Romeo Santander, hepe sa City Intelligence Branch (CIB) sa CCPO nagkanayon nga nakadawat sila og mensahe gikan sa America sa miaging gabii base sa area code niini apan naputol.
Base sa ilang gihimong pakisusi sa pagkatawo sa biktima ila usab nasuta nga wala kini criminal record sa ilang nasud ug ubang dapit sa kalibotan.
Si Efergan usa na ka regular costumer sa maong hotel ug mi-check in siya niadtong Enero 2 ug gikatakda untang mobalik sa Israel karung Hunyo 30. - BANAT NEWS