Insertion gidili na - Bucao

CEBU, Philippines - Human sa mga negatibong reaksiyon sa minoriya batok sa insertion o sal-ot sa mga umulong resolusyon sa konseho sa dakbayan sa Talisay, si Bise Mayor Alan Bucao miluwat og direktiba sa hingpit na nga pagdili sa mga insertion o sal-ot sa unsa mang resolusyon o ordinansahon sukad karon.

Si Bucao nagkanayon nga iyang gimandoan ang SP secretary nga dili na modawat sa mga insertion o amendamento nga di malakip sa ilang order of business.

Kahinumdoman nga ang mga sakop sa minoriya nga sila si Konsehal Romeo Villarante, Val Ylanan ug Danny Caballero mireklamo atol sa ilang regular session niadtong Martes bahin sa mga resolusyon nga gisal-otan og mga butang nga wala maapil sa ilang calendar of business.

Ang tulo nagkanayon nga ang maong sistema nakalapas sa ilang house rules diin ang tanang resolusyon ug ordinansa nga tukion sa umaabot nga sesyon masumitir   na ngadto sa secretary sa Sangguniang Panglungsod kutob sa alas 12:00 sa udto sa adlaw’ng Biyernes aron matun-an pa kini  sa dili pa ang sesyon sa adlaw’ng Martes sunod semana.

Si Bucao sa iyang bahin, mihimakak nga dunay kalapasan sa nahisgutang sistema tungod kay sa dili pa nila tuki-on ang mga resolusyon o ordinansahon sa ilang sesyon magpahigayon man sila og caucus kalabot sa mga butang nga ilang giplanohang isal-ot sa resolusyon o ordinansa nga tukion sa regular nga sesyon.

Matud ni Bucao nga kun aduna may nahimong kalapasan ang pagsal-ot, ang tanang sakop sa konseho sa siyudad, matawag nga guilty tungod kay ‘collegial agreement” o gikasabotan ug gihiusahan man nila ang ilang gibuhat. (BANAT NEWS)