Delos Santos naglagot

CEBU, Philippines - Wala mahimuot si konsehal Mary Ann de los Santos sa barangay Lahug ning dakbayan sa Sugbo sa gipahigayong public hearing kagahapon atubangan sa mga konsehal sa siyudad sa Sugbo kalabot sa ilang pagsupak sa giduso nga plano nga tukoran og menteryo ang Osmeña Shrine sa Barangay Kalunasan alang sa dili mga Katoliko.

Nagkanayon si de los Santos nga wala kaayo niya ma-eksplikar og tarong ang iyang pagsupak sa maong plano gumikan kay gitagaan lang siya og tres minutos sa konseho sa pagpadayag sa iyang sentimento, apan si Kongresista Tomas Osmeña nga dakong uyon sa maong sugyot, misaylo sa tres minutos.

“Unfair kaayo sa akong side, nanghinaut lang ko nga independent unta sila (konseho) sa isyu,” nagkanayon si de los Santos kinsa mitataw nga ang mga tawo nala’y mohukom kung patas ba o dili ang mga konsehal sa siyudad sa Sugbo.

Gipanghimakak usab ni de los Santos ang komento sa pipila ka mga konsehal nga matud pa, arogante kuno kaayo ang iyang tuno kagahapon sa iyang pagpalanog sa iyang sentimento.

Giklaro niya nga igo lang siyang mitunol sa iyang mensahe nga nakadukomento ug wala siya’y nakitang dautan sa iyang pamahayag. (BANAT NEWS)