CEBU, Philippines - Usa ang naangol samtang walo usab ka balay ang naugdaw, ug mikabat sa P200 mil ang balor sa mga kabtangang gikaon sa kayo sa sunog nga miigo didto sa Riverside sa sitio Lahinglahing, barangay Mabolo ning dakbayan sa Sugbo kagahapon pasado ala 1:00 sa hapon.
Si Cebu City Fire Marshall Anderson Comar miingon nga ang alarma sa maong sunog ilang nadawat sa ala 1:05 sa hapon ug sulod lang sa 10 minutos nakontrolar na nila ang kayo.
Matud pa ni Comar nga unom ka balay ang hingpit nga naugdaw samtang duha ang igo lang nakan-an sa kayo.
Midugang si Comar nga ang maong sunog ,naggikan sa balay sa usa ka Analyn Ortega ug gisusi pa nila ang hinungdan niini.
Samtang ang naangol mao ang usa ka Grade 3 nga estudyante sa Mabolo Elementary School nga nasangit sa alambre dihang miambak kini sa sapa aron paglikay sa kayo.
Samtang sa report sa ABS-CBN Central Visayas, may usa ka 10-anyos nga bata nga nakasaksi sa maong hitabo ug mibutyag nga usa ka telebisyon ang mibuto ug ang kayo niini mikaon sa kurtina sa balay nga maoy sinugdanan sa dakong sunog.
Ang mga balay nga naugdaw kasagaran ginama sa mga gaan nga materyales.
Ang mga biktima gipahiluna dayon sa kagamhanan sa mga evacuation center sa Mabolo. (BANAT NEWS)