Kuratong Baleleng gipanid-an

CEBU, Philippines -  Gipahugtan sa Cebu City Police Office ang seguridad pinaagi sa paghingusog sa police visibility sa siyudad tungod sa report nga ania pa sa Sugbu ang mga sakop sa Kuratong Baleleng robbery gang sumala pa ni Sr. Supt. Melvin Ramon Buenafe.

Ang maong grupo mimasaker sa usa ka pamilya sa dakbayan sa Lapulapu diin ang lalaking biktima nga si Fernando Villanueva Canillo alyas Bruno Villanueva kanhi sakop sa ilang grupo nga giingong mibuwag kanila tungod sa wala maayong pagbinahinay sa ilang gitulis. Lakip sa gipatay ang kapuyo niining si Emma Larino ug ang 3-anyos nilang anak.

Matud pa ni Buenafe ang grupo nasigpatan dinhi sa Sugbu sa wala pa mahitabo ang masaker sa sitio Judas Belt sa barangay Babag 2 sa dakbayan sa Lapulapu niadtong miaging semana.

Si Buenafe miingon nga ang numero unong suspek sa masaker nga si Ricky Cadavero alyas ‘Uncle Kambal’ nakuha sa usa ka close-circuit television camera sa usa sa mga establisamento dinhi sa dakbayan.

Usa sa gipalihok nila karun mao ang mga sakop sa Barangay Peacekeeping Action Team (BPAT) nga maniid sa ilang tagsa-tagsa ka lugar ug ilhon kadtong mga tawo nga bag-o lang namuyo. (BANAT NEWS)