Drayber gipatay sa bata

CEBU, Philippines -  Patay ang usa ka pedicab drayber human kini gidunggab sa usa ka menor de edad samtang nakiglalis ang biktima sa laing pedicab drayber pasado alas-7 sa niaging gabii diha sa D. Durano St., sa barangay Suba sa dakbayan sa Danao.

Segun sa report nga midangat sa operations branch sa Cebu Provincial Police Office (CPPO) nga usa ka Dioscoro Durano, tanod sa maong lugar mi-report sa kapulisan kabahin sa nahitabong pagpanunggab.

Si SPO1 Rodrigo Roble daling miresponde ug mipahigayo’g imbestigasyon ug giila ang biktima nga si Nelson Lawas, 49, residente sa naasoy’ng dapit.

Usa ka 16-anyos nga menor de edad ang gitumbok nga nakadunggab sa biktima kinsa padayon pang gipangita sa kapulisan.

Sa imbestigasyon sa kapulisan nagbutyag nga nagbarog ang biktima atubangan sa usa ka internet café’ sa dihang nagkalalis sila sa laing pedicab drayber nga si Jacinto Banzon.

Ang suspek nga 16-anyos kalit lang miduol ug gidunggab ang biktima sa walang bahin sa iyang lawas hinungdan nga gidali pagdala sa district hospital apan gideklarar nga dead on arrival (DOA).

Si Roble nga nahinabi sa Banat News nagkanayon nga gipasanginlan ni Banzon ang biktima nga maoy nagguba sa lingkoranan sa traysikol niini.

Matud ni Roble nagkaon ang suspek unya nakakita nga dunay gikalalis si Banzon kinsa maoy nagmatuto kaniya hinungdan nga milaban ang menor de edad ug giduol ang biktima ug gidunggab.

Matud ni Roble wala pa nila mapasaka-i og sumbong ang menor de edad sanglit nagpaabot pa sila sa resulta sa awtopsiya sa patay’ng lawas sa biktima ug sa kabanay niini.(EIM)(BANAT NEWS)