Drug rehab center sa Lahug ibalhin

CEBU, Philippines -  Si kanhi Undersecretary Paul Clarence Oaminal sa Dangerous Drugs Board (DDB) miawhag sa mga dagko og yuta ning dakbayan sa Sugbo nga modonar og luna nga katarokan og edipisyo sa   Cebu City Treatment and Rehabilitation Center (CCTRC).

Kini samtang gitakda na nga papahawaon na ang   CCTRC gikan sa luna nga gitarokan niini sa barangay Lahug ning dakbayan sa Sugbo.

Ang CCTRC maoy pahuwayanan sa mga tawong   nagumon sa gidiling drugas.

Gipasabot ni Oaminal nga iya kining gihimo tungod kay nagpakabana siya sa kahimtang sa gatusan ka mga drug dependent nga maoy apektahan unya kun gub-on na ang CCTRC nga nahimutangan nila karon. Dugang ni Oaminal nga nasagmuyo bahin ning isyu sa mga drug rehabilitation center kay bisan pa kun gimandoan na sa Akta Republika 9165 ang lokal nga kagamhanan nga paggahinon og salapi aron patukoron og drug rehabilitation center sa ilang hurisdiksiyon apan daghan gihapon ang wala magpakabana sa pagtuman niini.

Dugang pa ni Oaminal nga sa 81 ka mga probinsya sa tibuok nasud aduna lay 3 ka mga probinsya ang hingpit nga nakatuman niini nga mao ang probinsiya sa Davao del Norte, Misamis Occidental ug Pampanga. Samtang ang kadaghanan sa mga rehab center sa nasud karon pulos gidumala sa Philippine National Police (PNP) ug National Bureau Of Investigation (NBI).

Hinuon alang kang Oaminal, kun gastohonon lang sa pagpatukod og edipisyo sa CCTRC, gipasalig niyang motabang siya sa lokal nga kagamhanan sa pagpangayo og pundo gikan kang Senador Vicente Sotto III kay dili kini makabalibad kaniya.

Ang importante lang karon mao ang luna nga katarokan niini, matud sa kanhi Usec sa DDB. (BANAT NEWS)