P.Noy imbitado sa tree planting sa RAFI

CEBU, Philippines -   Ang presidente sa nasud nga si Benigno Simeon Aquino III gikatakdang mobisita sa dakbayan sa Talisay karong Hunyo 25, 2011 atol sa ipahigayong Run 2 Plant 4 Green Philippines sa Ramon Aboitiz Foundation Inc.(RAFI).

Ang maong kalihukan ipahigayon diha sa lima ka ektaryang luna sa bukirang bahin sa barangay Lagtang diin sobra sa 12,000 ka mga kahoy ang itanom.

Si Bise Mayor Alan Bucao nga nahinabi sa mga tigbalita kagahapon nagkanayon nga dakong garbo sa siyudad kung ugaling modayon og bisita sa Talisay ang presidente alang sa maong kalihukan.

Matud ni Bucao nga ang maong kalihukan gipasiugdahan sa RAFI apan matawag kini nga usa ka joint-venture tali sa Talisay ug kagamhanan sa probinsiya.

Apan nasagmuyo ang maong opisyal tungod kay bisan sa kadako sa papel sa dakbayan sa Talisay sa maong kalihukan wala gyud hatagi og komplemento sa mga nag-organisa.

Usa sa ilang naobserbahan nga bisan sa tarpaulin sa maong kalihukan wala gyud bisan nalang hisguti ang pangalan sa siyudad Talisay. Matud pang Bucao sa sinugdanan palang ang mga kawani sa city hall sayo palang sa buntag maoy mosaka ngadto sa venue aron motabang.

“I am speaking in behalf of the city government of Talisay kay wala man si mayor dinhi atoa man sa provincial development council, in behalf of Talisay and in behalf of city council, it’s very unfair nga Talisay is doing their homework ba, laliman ka ana as early as four o’clock ang atong mga job orders magkawot na didto? Unya we’re expecting to prepare 12,500 holes to be planted, pero wa gyud ka makakita sa tarpaulin nga naay logo sa Talisay o dunay giingon nga this is a joint venture of RAFI, Talisay and provincial government,” ni Bucao pa.

Gipasabot ni Bucao nga gipadayag lang niya ang ilang gibati sa konseho tungod kay sama sa “one sided” lang ang kalihukan.

Sa laing bahin, si Chief Inspector Eddie Recamara, officer-in-charge sa Talisay City Police Station sa pakighinabi sa Banat News kagahapon nagkanayon nga 100 porsiyentong higpitan ang seguridad nga ipatuman kun mahinayon ang presidente. (BANAT NEWS)