Killer buli 3 patay

CEBU, Philippines - Patay diha dayon ang tulo ka mga tawo, samtang tulo usab ang nakalingkawas atol sa pagkaputol sa punoan sa kahoy nga midat-og sa duha ka panimaly didto sa sitio Kalubihan, sa Labogon dakbayan sa Mandaue kagahapon sa kaadlawon.

Ang gideklarar nga patay nang naabot sa tambalanan mao si Romeo Dimpas, 44, ug ang asawa niini nga si Teresa, 45, samtang sa pikas panimalay ang nakalas mao si Richard Herodias, 27, pulos mga residente sa maong dapit.

Ang nakalingkawas mao si Hiede Herodias, 27, asawa ni Richard ug ang 3-anyos nga anak niini ug ang anak ni Dimpas nga si Rod Walter Dimpas, 18.

Matud pa ni Hiede Herodias, mga alas 12:37 kagahapon sa kaadlawon samtang natulog sila sud sa ilang panimalay kalit lamang mipaka ang ilang atop ug diretso ngadto sa nahimutangan sa iyang bana ang punoan sa buli.

Naluwas si Hiede ug ang iyang anak nga 3-anyos gumikan kay wala sila motupad sa iyang bana sa pagkatulog, apan bisan pa niini nahiagom gihapon sila og mga pangos sa kalawasan.

Samtang si Rod Walter Dimpas nga nag-drawing sa papel sa ilang sala niadtong hitaboa nahibulong kini nga kalit dunay nahagsa sa iyang tupad diin nahimutang ang iyang mga ginikanan nga natulog.

Matud pa ni Walter ang mga haligi ug atop sa ilang panimalay ang hinungdan sa hinanaling kamatayon sa iyang mga ginikanan ug swerte na lamang siya nga nakalingkawas sa maong disgrasya.

Miabot pa og upat ka oras una pa naugkat ang patay’ng lawas ni Herodias sa mga rescuers. Gidali og dala sa tambalanan ang tulo ka biktima apan gideklarar na sila nga mga patay na.

Samtang si Labogon barangay kapitan Damaso Tumulak mibutyag sa Banat News nga dunay 30 ka mga gabok nga kahoy lakip na niini ang mga punoan sa buli nga delikado nga matumba.

Gumikan niini nagplano ang barangay nga ilang pamutlon ang mga punoan sa lubi ug buli nga gabok na aron dili na kini makadisgrasya sama sa maong trahedya.

Niadtong milabay’ng tuig sa kasikbit nga barangay sa Basak, usa ka tawo usab ang nakalas human matumbahi og punoan sa buli ang panimalay niini.

Nasayran nga sagad sa panginabuhian sa pipila ka mga karaang molupyo sa maong mga barangay lakip na sa barangay Paknaan ang nagsalig sa makuhang palwa ug dahon sa buli aron himuong silhig nga ilang ibaligya. (EIM) (BANAT NEWS)