Minoriyang grupo mireklamo sa sal-ot

CEBU, Philippines - Ang mga konsehal sa minoriyang grupo sa dakbayan sa Talisay mireklamo sa gipanal-ot sa mga resolusyon o ordinansa nga wala nila matuki sa “order of business” sa ilang sesyon.

Ang mireklamo niini mao si Konsehal Romeo Villarante kinsa mibutyag sa mga tigbalita nga dili lang kay usa ka higayon siya makadiskobre niini.

Gipasabot ni Villarante nga gawas kung gikihanglan ug importante o “urgent matter” ang ipasar nga balaod gikan sa mayor o sa bise mayor pweding mahatagan og konsiderasyon tungod kay gitugotan kini sa local code apan angay silang (minoriya) hatagan og tukmang panahon nga matun-an kini una ipasar sa konseho.

Matud usab ni Villarante nga mihangyo siya sa iyang mga kauban sa konseho nga kung adunay i-insert nga ordinansa pahibaw-on gyud silang minoridad nga grupo usa ka adlaw sa dili pa ang ilang sesyon.

Ang konseho sa dakbayan sa Talisay mopahigayon sa ilang regular nga sesyon matag Martes sa buntag.

Niadtong Martes, lima ka mga insertion nga   naglakip sa pag-amendar sa Ordinance No. 2010-05, pagpasar sa Resolusyon 2611-19, resolusyon nga nag-awhag sa mayor sa pagpagamit og sakyanan nga sakyan sa mga vendor sa pagbalhin nila ngadto sa bag-ong merkado sa Lagtang, resolusyon nga nagdayeg kang SFO1 Rudyard Tiu Abellanosa sa Talisay City Fire Station sa pagka-excellence niini sa iyang fire protection supervisory course, ug resolusyon nga nag-awhag sa mayor sa pagkontrolar sa iluwat nga operator’s permit sa mga traysikol.

May mga naaprobahang resolusyon ug ordinansa nga may sal-ot, apan ang duha ka resolusyon nga giduso ni Konsehal Danny Caballero nga sakop sa minoriya nga dugay nang naandam wala aprobahi.  - BANAT NEWS