Pasahero di palabayo'g basura sa dalan

CEBU, Philippines - Naglaraw ang kagamhanan sa lalawigan sa Sugbo sa pagpanday og balaod nga magdili sa pasahero sa mga pangpubliko ug pribadong sakyanan sa paglabay sa ilang mga basura sa kadalanan.

Kini human makita sa composite team sa Search for the best Egwen Highway and Thoroughfares nga sagad sa mga basura nga makita sa kadalanan gikan sa mga pasahero sa jeep ug bus pasaheroan.

Si Gobernador Gwendolyn Garcia mihangop usab sa sugyot nga gipadangat sa composite team nga gipalanog atol sa ilang tigum niadtong adlaw nga Martes didto sa iyang buhatan.

Matud pa sa gobernadora nga nagkihanglan siya sa tukmang lakang sa mga sakop sa hunta probinsiyal nga mopanday sa maong balaodnon.

Giklaro hinuon ni Garcia nga ang mao unyang ordinansa magmando sa mga bus pasaheroan ug pribadong mga sakyanan sa tibuok lalawigan sa pagbadlong sa   ilang mga pasahero nga dili magpataka og labay sa ilang basura sa dili pa sila mobiyahe.

Ang konduktor maoy gitahasan sa maong pahinumdom aron nga magpakabana ang mga pasahero sa maong balaod.

Samtang si Bise Gobernador  Agnes Magpale sa iyang bahin miingon nga iyang itugyan ang maong sugyot ngadto kang bokal Thadeo Ouano sa sixto distrito gumikan kay siya man ang chairman sa Environmental Conservation and Natural Resources sa provincial board. - BANAT NEWS